Мемлекет басшысы Қасым-Жомарт Тоқаев саяси жүйені жаңғыртып, мемлекеттік басқару ісіне, заң шығару процесіне өзгерістер енгізуді бастап кетті. Оның айқын дәлелі ретінде 5 маусым күні өтетін референдумды айтуға болады.
Рас, бір жүйеден екінші жүйеге ауыса салу оңай емес. Ол үшін ең алдымен адамдардың өміріне кепіл болатын құнды құжат —Конституцияны өзгерту керек. Одан кейін сол құжатты негізге алып, жаңа жүйемен жұмыс істейтін жас кадрлар даярлау қажет. Бұл бүгінгі қоғамның басты талабы. Өйткені ескі жүйе, ескі сүрлеу елді жалықтыра бастағанын, халық та әділетті қоғамда, тең дәрежеде өмір сүргісі келетінін ашық айта бастады. Кешегі қаңтар оқиғасында елдің бұл талабы ашық айтылып та жатты. Енді міне, елдің сол талабына құлақ түретін бүгінгі билік оны ертерек жүзеге асыру жолдарын қарастыра бастады. Бірақ, біз бір нәрсені жақсы түсінуіміз керек, қандай да бір өзгерісті жалғыз Президент немесе үкімет басындағылар жүзеге асыра алмайды. Оны халық болып қолдауымыз керек. Егер біз өзгерісті қаласақ, бұл референдум сол өзгерістерге жасалып жатқан алғашқы қадам. Былайша айтқанда, мүмкіндік! Ендеше, сол мүмкіндікті жіберіп алмай, барынша тиімді пайдалана білейік!
Жүнісбекова Жанат Мансұрханқызы, құқықтану магистры, “ОҚО талдау және болжау орталығы” қоғамдық бірлестігінің сарапшысы
