ӘКІМДЕР АУЫЛДЫҚ АУМАҚТАРДЫ ДАМЫТУҒА ЖАҢА ТӘСІЛДЕР ЕНГІЗУДЕ
“Әкімдер мектебінде” оқудың алғашқы екі айының қорытындысы бойынша жергілікті билік өкілдері жұмыста жаңа тәсілдерді қолдана бастады. Бірнеше өңірде кооперациялық жобалар іске қосылды, ал ауылдық округтерде экономикалық дамудың жаңа өсу нүктелері анықталды.
Қазіргі таңда бағдарламаға аудан, аудандық маңызы бар қала, ауыл, кент және ауылдық округтердің 1810 әкімі қатысуда. Оқу 17 облыстағы Мемлекеттік басқару академиясының аймақтық филиалдары базасында өтуде. Бағдарлама аясында қатысушылар өндіріс пен тұтыну талдауы, өткізу нарықтарын скринингтеу, кооперациялық жоспарлау және аумақтардың экономикалық дамуы негіздерін меңгерді.
«Қатысушылар жұмысқа нақты құралдар алғанын атап өтуде — тауарлық массаны есептеуден бастап кооперация стратегиясы мен қаржылық жоспарлауға дейін. Бірқатар округтерде кооперативтер құруға дайындық басталды, ал бюджет жоспарлары жаңартылған экономикалық деректерге сәйкес қайта қаралуда. Мысалы, Қостанай облысындағы Жданов ауылдық округінің әкімі Мендығали Ибраев қымыз өндіру, оны қаптап сату және сауда желілеріне шығару бойынша ауыл шаруашылығы өндірістік кооперативін (АШӨК) құруды бастамалады. Ал Убаган ауылдық округінде сүт бағытындағы кооператив жобалануда. Бұл жоба сүтті тікелей өңдеуші кәсіпорындарға жеткізуді қамтамасыз етіп, фермерлердің субсидия алуына мүмкіндік береді», – дейді «Әкімдер мектебі» жобасының жетекшілерінің бірі Нұрлыбек Мұқанов.
Айта кету керек, оқу процесі акимдердің күнделікті жұмысынан ажыратпай, жаңа білімді бірден тәжірибеде қолдануға мүмкіндік береді. Бағдарлама шынайы міндеттерге бағытталған: тыңдаушылар өз округтерінің нақты деректерімен жұмыс істеп, көрсеткіштерді талдап, есептеулер жүргізеді. Аймақтық кейстер, топтық тапсырмалар, практикалық есептер мен менторлық қолдау кеңінен қолданылады.
Қазіргі уақытта акимдер өз округтерінің экономикалық даму жоспарын аяқтауда. Келесі кезең — бастамаларды іске асыру.
Оқу 2025 жылғы 17 ақпаннан 13 мамырға дейін өтеді. Курстың жалпы көлемі — 240 сағат, оның 140 сағаты заңнама мен мемлекеттік басқару тақырыптарына, ал 100 сағаты — ауылдық аумақтардың экономикалық дамуына арналған. Бағдарламаның соңында қатысушылар өздерінің экономикалық даму жобаларын ұсынады. Бұл жобаларды жүзеге асыру барысында Үкіметтің өңірлік саясат жөніндегі жобалық офисі мен «AMANAT» партиясы әдістемелік және практикалық қолдау көрсететін болады.
