Түркістан облысы шомылу маусымы бойынша брифинг өткізілді
Түркістан облысының Өңірлік коммуникациялар қызметінің базасында жазғы кезеңде судағы қауіпсіздік мәселелері бойынша брифинг өтті. Аталған іс-шараның спикері Түркістан облысы Төтенше жағдайлар департаменті (ТЖД) Азаматтық қорғаныс басқармасының бастығы Дуйсен Оразгелды болды.
Өз сөзінде ол облыс аумағында жаппай демалуға арналған 45 орын белгіленгенін атап өтті. Сонымен қатар, Арыс қаласы, Ордабасы, Сауран және Бәйдібек аудандарында қосымша коммуналдық жағажайлар ашылғанын хабарлады. Шомылуға тыйым салынған су объектілерінде 111 орын анықталған.
Құтқару бекеттері мен патрульдер жүзу құралдарымен, Александров ұштарымен, құтқару шеңберлерімен, жилеттермен, ысқырықтармен және дауыс зорайтқыш құралдарымен жабдықталған. Бұл жабдықтар судағы қауіпсіздікті қамтамасыз етуге және төтенше жағдайлардың алдын алуға бағытталған.
Шомылу маусымы басталғаннан бері су айдындарында 6 мыңнан астам рейд жүргізіліп, халықпен профилактикалық әңгімелер өткізілді. 130 мыңнан астам жадынама таратылып, 412-бап бойынша әкімшілік жауапкершілікке 57 жеке тұлға және 1 жеке кәсіпкер тартылды.
Статистика көрсеткендей, судағы оқиғалар көп жағдайда адамның кінәсінен, өз күштерін қате бағалау, мас күйінде болу және балаларды ересектердің қарауынсыз қалдыру нәтижесінде болады. Барлық адам өлімі шомылуға тыйым салынған жерлерде тіркелген. Спикер азаматтар үшін, сондай-ақ ресми шомылу орындарының иелері үшін қауіпсіздік талаптарын жеткізді.
Брифинг барысында су айдындарында қауіпсіздікті қамтамасыз ету бойынша маңызды ақпараттар айтылды. Су айдындарында демалатын азаматтар өз қауіпсіздігіне жауапты болып, шомылуға тыйым салынған жерлерде суға түспеу керек. Сонымен қатар, балаларды үнемі ересектердің бақылауында ұстау қажет.
Бұл брифинг Түркістан облысының тұрғындары үшін судағы қауіпсіздік шаралары туралы маңызды ақпараттармен қамтамасыз етті. Алдағы уақытта ТЖД және басқа да жауапты органдар су айдындарында қауіпсіздікті қамтамасыз ету жұмыстарын жалғастыра бермек.
