Түркістан облысында жойқын жер сілкінісіне дайындық жаттығуы өтті

Түркістан облысында жойқын жер сілкінісі болған жағдайда азаматтық қорғау қызметтері мен облыстың жергілікті атқарушы органдарының іс-қимылдарын пысықтау мақсатында кең ауқымды жаттығу өтті. Бұл шараның мақсаты – апатты жағдайларда шұғыл әрекет ету қабілетін арттыру және төтенше жағдайларға дайындық деңгейін тексеру болды.

Жаттығу сценарийі бойынша, облыс орталығында күшті жер сілкінісі орын алып, көптеген ғимараттар қирап, өрт ошақтары пайда болған. Әсіресе, он екі қабатты үйде жағдай күрделі болды. Пәтерлердің бірінде қою түтінмен оранған тұрғындар өздігінен шыға алмай қалған. Өрт жедел таралып, балкон арқылы жоғарыдағы пәтерлерге қауіп төндірді. Баспалдақ алаңының қирауы салдарынан тұрғындарды эвакуациялау қиынға соқты.

Оқиға орнына тез арада жеткен өрт сөндірушілер газ-түтіннен қорғау қызметінің арнайы бөлімшесін құрып, тез арада әрекетке кірісті. Олар зардап шеккендерді түтін ішінен іздеп, қауіпсіздік баспалдақтары арқылы эвакуация жасап, өртті сөндірді. Қалған тұрғындар «өмір текшесі» арқылы қауіпсіз жерге көшірілді, ал жарақат алғандар арқан арқылы түсіріліп, Апаттар медицинасы орталығының дәрігерлерінен алғашқы медициналық көмек алды.

Жаттығудың келесі кезеңінде құтқарушылар ғимараттың ішінара қирауынан үйінділер астында қалып қойған адамдарға көмек көрсету жұмыстарына кірісті. Бұл кезеңде альпинистік жабдықтар, кинологиялық есептер мен гидравликалық құралдар кеңінен қолданылды.

Сонымен қатар, облыстық сот ғимаратында да жойқын жер сілкінісі жағдайында іс-қимылдарды пысықтау жаттығуы өтті. Мұнда да азаматтық қорғау қызметтері тез әрі тиімді әрекет етуді көрсетті.

Бұл жаттығу азаматтық қорғау қызметтері мен жергілікті атқарушы органдардың төтенше жағдайларға дайындығын күшейтуге бағытталған маңызды қадам болды. Облыс әкімшілігі болашақта осындай жаттығуларды жиі өткізіп, тұрғындардың қауіпсіздігін қамтамасыз етуге баса назар аударатындарын мәлімдеді.