Бектенов министрдің баяндамасынан “артық” зауытты байқады

Премьер-министр Олжас Бектенов экология министрі Ерлан Нысанбаевтың баяндамасынан қоқыс өңдейтін екі “артық” зауытты байқады. Ол бүгін үкімет отырысында қатты тұрмыстық қалдықтарды қайта өңдеу мәселесі туралы ақпарат берді, – деп хабарлайды janalyq.kz.

“Бұған дейін берілген ақпарат бойынша, 35 зауыт салынады. Есепте 37 жаңа зауыт салынады дедіңіз. Тағы 2 жаңа зауыт қайдан шықты?” – деп сұрады Бектенов Нысанбаевтан.

“Астана бойынша тағы екі зауыт қосылды. Кеше есепке қосылды. Слайдтар өткен аптада берілген”, – деп жауап берді министр.

Бұдан кейін премьер-министр әңгіме нақты жүзеге асырылатын жобалар туралы ма, деп сұрады. Нысанбаевтың айтуынша, бұл жобаларға қатысты мәселелер күн сайын уәкілетті органдармен талқыланады.

“Әрбір әкімдікте күн сайын облыс әкімінің тиісті орынбасарлары, сондай-ақ тиісті басқарма қызметкерлерімен бірлесіп жұмыс жүргізіліп жатыр. Әрбір жоба қаралды. Мұнда бұл жобалардың дайындық деңгейі өте жоғары”, – деді шенеунік.

Үкімет басшысы бұл мәселені бақылауда ұстауға уәде беріп, министрден нақты деректер беруді талап етті.