Қасым-Жомарт Тоқаев Асқар Маминнің биылғы қаңтар-тамыз айларындағы еліміздің әлеуметтік-экономикалық даму қорытындылары туралы есебін тыңдады.
Үкімет басшысы сегіз ай ішінде өңдеу өнеркәсібінде 3,3% – ға, оның ішінде машина жасауда – 16,3% – ға, оның ішінде автомобиль жасауда – 51,8% – ға, сондай-ақ фармацевтикада-34,1% – ға, жеңіл өнеркәсіпте-11% – ға, химия өнеркәсібінде-3,1% – ға және дайын металл бұйымдарын өндіруде-18,8% – ға өсім қамтамасыз етілгенін баяндады. 2020 жылы Индустрияландыру картасы аясында жалпы сомасы 996 млрд теңгеге 206 жобаны іске қосу жоспарланған.
Бұл өндіріс көлемін 1,3 трлн теңгеге арттыруға, экспортты 325 млрд теңгеге ұлғайтуға, шамамен 19 мың жаңа жұмыс орнын ашуға мүмкіндік береді. Жыл басынан бері 71 мың тұрғын үй салынды, бұл өткен жылдың сәйкес кезеңіндегі көрсеткіштен 8,6% -ға жоғары.
Ауыл шаруашылығында тұрақты өсім 4,9% -ға қамтамасыз етіліп, тамақ өнімдері өндірісінің көлемі 3,6% -ға өскен. А.Мамин қабылданған шаралар әлеуметтік маңызы бар тауарлар бағасының өсуін 4,4% деңгейінде тұрақтандыруға мүмкіндік бергенін, бұл өткен жылғы көрсеткіштерден екі есе төмен (8,7%) екенін атап өтті. Жыл басынан бері мемлекеттік бағдарламалар аясында жұмыспен қамтуға жәрдемдесу шараларымен 847 мың адам қамтылды, бұл өткен жылдың көрсеткішінен 82,1% – ға артық.
Кездесу қорытындысы бойынша Мемлекет басшысы халықты жұмыспен қамту, кәсіпкерлік субъектілерін қолдау, өндірістік процестерге жаңа технологияларды енгізу, эпидемиологиялық жағдайды тұрақтандыру және карантиндік талаптарды кезең-кезеңімен жеңілдету жөніндегі шараларды іске асырудың маңыздылығын атап өтті.
