Бұл туралы Ұлттық экономика министрі Руслан Дәленов хабарлады.
Мемлекет басшысының тапсырмасына сәйкес, «Халық үніне құлақ асатын мемлекет» тұжырымдамасын орындау шеңберінде шешім қабылдау процесіне тұрғындарды тарту масқатында «Халық қатысатын бюджет» жобасын іске асыру көзделген. Бүгінде жоба қалалар мен облыстық маңызы бар қалалардағы 55 ауданда, оның ішінде Алматы және Нұр-Сұлтан қаласындағы барлық аудандарда енгізілуде», – деді министр.
«Халық қатысатын бюджет» жобасы келесі тәртіп бойынша жүзеге асырылады: веб-порталда идеялар конкурсы өткізіліп, нақты сол ауданның барлық тұрғыны аудандық әкімдікке өздері маңызды деп тапқан жобаны жүзеге асыруды ұсынады. Келіп түскен өтінімдер талданып, кейін ол бойынша «1 тұрғын-1 дауыс» тәртібімен ашық дауыс беру жүргізіледі. Дауыс берудің нәтижесі бойынша сарапшылық қауымдастық жобаларды қаржыландыру кезегін белгілейді. Аудандық әкімдіктің сайтында тұрғындардың қандай жобаға қалай дауыс бергенін көруге болады. Жобалардың авторы, статусы, суреті жарияланады. Жоба авторы тұрғын үй ПИК-і немесе тұрғын бола алады.
2019 жылы жоба аясында азаматтар 1,5 млрд теңгеге ұсыныс беріп, аулаларды абаттандыру, аула және спорт алаңдарын салу жөнінде 69 жоба мақұлданды.
“Ағымдағы жылы «Халық қатысатын бюджет» жобасын облыстық маңызы бар басқа да қалаларға енгізу бойынша жұмыстар жүргізілуде”, – деп хабарлады Дәленов.
Ол «Халық қатысатын бюджет» жобасы “Халық үніне құлақ асатын мемлекет” тұжырымдамасы аясындағы азаматтардың бюджет процесіне қатысуын кеңейту құралының бірі болып табылатынын айтты. Үкімет «Халық қатысатын бюджет» жобасының аясын кеңейтіп, оған барлық облыстық маңызы бар қалаларды қосуды көздейді.
