Жаңаарқа ауданында «Отбасылық ферма» жобаларының жүзеге асу барысы бақылауға алынды
Ұлытау облысының әкімі Дастан Рыспеков жұмыс сапарымен Жаңаарқа ауданына барып, «Отбасылық ферма» бағдарламасы аясында іске асырылып жатқан жобалардың барысымен танысты. Сапар барысында өңірдегі аграрлық сектордың даму деңгейі, инвестициялық жобалардың тиімділігі және өндірістік инфрақұрылымның жаңғыртылуы мәселелері қаралды.
Орынбай ауылында бүгінгі таңда 700 млн теңге көлемінде инвестиция құйылып, жаңа агрокешеннің құрылысы жүргізілуде. Аумағында қора-жайлар, әкімшілік ғимарат, жұмысшыларға арналған тұрғын үйлер мен мал бордақылау алаңы салынып, заманауи техникалар орнатылуда. Кешен аумағында облыста алғаш рет мал суаруға арналған жаңа, заманауи құрылғы пайдалануға берілді. Бұл құрылғы өнімділікті арттыруға және ауыл шаруашылығының сапалы дамуына айтарлықтай үлес қосады.
Бидайық ауылдық округіндегі «Берікбол» шаруа қожалығы да «Отбасылық ферма» жобасы аясында ірі қара мал басын көбейту жұмыстарын жалғастыруда. Жобаның негізгі мақсаты – қазіргі заманғы технологияларды қолдана отырып, бордақылау және сату үшін тиімді өндірістік база құру, инфрақұрылымды жаңғырту және толық өндірістік циклды қамтамасыз ету.
Сапар барысында өңір басшысы мемлекет тарапынан көрсетіліп отырған қолдаудың ауыл шаруашылығын дамытудағы маңыздылығын атап өтті. Ол бөлінген қаражатты тиімді әрі мақсатты пайдалануды, барлық «Отбасылық ферма» жобаларының ай сайынғы мониторингін жүргізуді, инвестицияның игерілу тиімділігі туралы нақты есеп беруді тапсырды. Сонымен қатар орнатылған заманауи суару құрылғысының жұмысын тексеріп, оның тәжірибесін басқа шаруашылықтарда қолдану мүмкіндігін қарастыруға кеңес берді.
Жаңа жобалардың іске асуы өңірдің әлеуметтік-экономикалық дамуына тікелей әсер етеді. Бұл бастамалар жаңа жұмыс орындарын ашуға, ауыл тұрғындарының табысын арттыруға және білікті кадрларды тартуға мүмкіндік береді. Сондай-ақ, жобалар арқылы ауыл шаруашылығында заманауи технологияларды енгізу, өндіріс тиімділігін арттыру және өңірдің экономикалық әлеуетін нығайту көзделуде.
Сапар соңында Дастан Рыспеков жергілікті тұрғындар мен фермерлерге мемлекеттік бағдарламалардың мүмкіндіктерін толық пайдалануға шақырып, жобалардың сапалы әрі уақытылы жүзеге асырылуын ерекше бақылауға алуды тапсырды. Бұл бастамалар «Социально-демографическое развитие» бағытының негізгі элементі болып табылады, өйткені олар ауылдық елді мекендердің тұрақты дамуына, тұрғындардың әл-ауқатының жақсаруына және өңірдегі еңбекке белсенді қатысу мәдениетінің қалыптасуына тікелей ықпал етеді.
