Сорбұлақ мәселесі Үкімет бақылауына алынуы мүмкін
ҚР Мәжіліс депутаты Данияр Қасқарауов Премьер-министр Олжас Бектеновке депутаттық сауал жолдап, Алматы облысындағы Сорбұлақ су қоймасына қатысты мәселені Үкімет деңгейінде қарауды талап етті.
Қазіргі уақытта қоймада 750 млн текше метр су жиналған. Депутаттың айтуынша, нөсер немесе жер сілкінісі болған жағдайда Ақши мен Күрті ауылдарын су басып, ластану Іле, Қапшағай және Балқаш аймақтарына дейін жетуі мүмкін.
Соңғы зерттеулер Сорбұлақ суынан 31 түрлі химиялық зат пен ауыр металл табылғанын көрсетті, оның ішінде кадмий нормадан төрт есе артық. Бұл — халық денсаулығы мен экологияға елеулі қауіп.
Қасқарауов мәселені шешу үшін мемлекеттік комиссия құруды, заманауи тазарту станцияларын салуды, бөлінген қаржыларға аудит жүргізуді және суды ауыл шаруашылығына пайдалануды ұсынды.
