Республика күні қарсаңында ШҚО-да заманауи тұқым өндіру зауыты іске қосылды

Шығыс Қазақстан облысының Ұлан ауданындағы Привольное ауылында заманауи тұқым өңдеу зауыты өз жұмысын бастады. Бұл кәсіпорын жеке инвестициялар есебінен өңдеу өнеркәсібін дамыту бағытында жүзеге асқан табысты жобалардың бірі болып табылады.

 

Жаңа зауыттың өндірістік қуаты сағатына 10 тоннаға дейін жетеді. Жобаның жалпы инвестиция көлемі — 460 миллион теңге, оның барлығы компанияның меншікті қаражаты есебінен қаржыландырылған. Кәсіпорында 8 тұрақты жұмыс орны құрылды, маусым кезінде қосымша жұмысшылар да тартылады.

 

Өнім түрлеріне бірінші буынды күнбағыс будандарының тұқымдары, сондай-ақ жоңышқа, рапс және бидай кіреді. Өндірістік процесс Westrup (Германия), Полымя (Беларусь), СиСорт (Ресей) сынды жетекші еуропалық және ресейлік өндірушілердің жабдықтары негізінде ұйымдастырылған. Қаптау желілері шетелдік қондырғылармен жабдықталған, ал қойма алаңының жалпы көлемі 2 500 шаршы метрден асады.

 

Тұқымдық материалды сұрыптау және өсіру жұмыстары Шығыс Қазақстан, Жетісу және Павлодар облыстарындағы арнайы алқаптарда жүргізіледі. Дайын өнім Қазақстан нарығына және ЕАЭО елдеріне — Ресей мен Беларуське экспортталады, әрі халықаралық сапа стандарттарына сай келеді.

 

Шығыс Қазақстан облысының әкімі Нұрымбет Сақтағанов бұл кәсіпорынның толық циклді өндіріс үлгісін көрсететінін атап өтті — яғни тұқым сұрыптаудан бастап соңғы өнімді тұтынушыға дейін жеткізу процесі жолға қойылған.

 

«Бұл – өңірдің аграрлық әлеуетін арттыру жолындағы маңызды қадам. Осындай жобалар экспорттық мүмкіндіктерді кеңейтіп, отандық ауыл шаруашылығының бәсекеге қабілеттілігін арттырады», – деді өңір басшысы.

 

Алдағы уақытта зауыттың өндірістік қуатын ұлғайту және экспорт географиясын кеңейту жоспарланып отыр. Бұл өз кезегінде Шығыс Қазақстанның еліміздегі тұқым шаруашылығының маңызды орталықтарының бірі ретіндегі орнын нығайта түспек.