Шығыс Қазақстанда “Жер-2025″РКШОЖ жалғасуда
Екінші кезеңде шартты жойқын жер сілкінісінің салдарын жою кезінде авариялық-құтқару құралымдарының практикалық іс-қимылдарын пысықтау жалғастырылды.
Кеңейтілген жедел штабта қалыптасқан жағдай бойынша жедел топ басшыларының баяндамалары тыңдалды.
Облыс тұрғындары сиреналардың дыбысын естіп, дүмпулер тоқтағаннан кейін үйлерінен шықты. Барлық қалалар мен аудандарда жұмыс істей бастаған зардап шеккен халықты қабылдау пункттері орналасқан Qr-кодтар бойынша нақтылап, оларға келді. Атап өтіп, қажетті көмекті алып, тұрғындар шатырлы лагерьге жіберілді.
Кеңейтілген шатырлы лагерьде тұрғын үй және коммуналдық-тұрмыстық аймақтар, медициналық пункт, тамақтану блогы, автокөлік тұрақтары қарастырылған. Тәртіп пен қауіпсіздікті қамтамасыз ету үшін лагерьде полиция қызметкерлерінің кезекшілігі ұйымдастырылды.
Апаттар медицинасы орталығының мамандары далалық аурухананы орналастырды. Психологтар халыққа шұғыл көмек көрсетті.
Қирау орындарында авариялық-құтқару жұмыстарын жүргізу үшін темір жол көлігімен келген инженерлік техника түсірілді.
РКШОЖ қорытындысы бойынша оқу-жаттығуға толық талдау жүргізілді, авариялық-құтқару құралымдарының дайындығына баға берілді, азаматтық қорғаудың мемлекеттік жүйесінің қызметін одан әрі жетілдірудің басым бағыттары айқындалды.
